මත්පැන් නිෂ්පාදන මත බදු අයකිරීමේ කාලය සංශෝධනය කරයි

මත්පැන් නිෂ්පාදනය සහ අලෙවිකරණය සම්බන්ධ බදු ගෙවීමේ කාලසීමාවන් හා ගාස්තු අයකිරීමේ ක්‍රමවේදය සංශෝධනය කරමින් නව ගැසට් නිවේදනයක් ජනාධිපති අනුර කුමාර දිසානායක මහතා විසින් නිකුත් කර ඇත. මුදල්, ක්‍රමසම්පාදන හා ආර්ථික සංවර්ධන අමාත්‍යවරයා ලෙසින් ඔහු විසින් නිකුත් කර ඇති මෙම නව ගැසට් නිවේදනය අද (28) දිනයේ සිට ක්‍රියාත්මක වනු ඇත. මෙහි ප්‍රධාන අරමුණ වන්නේ සුරාබදු ගෙවීම් පැහැරහැරීම අවම කිරීම සහ බදු ගෙවීම් ක්‍රියාවලිය වඩාත් කාර්යක්ෂම හා දැඩි කිරීමයි. සුරාබදු ආඥා පනතේ 22 වන වගන්තිය යටතේ, සෑම බලපත්‍රලාභියෙකුම නියමිත දිනට හෝ එයට පෙර බදු ගෙවිය යුතු බව නව නීතිය ප්‍රකාශයට පත් කරයි. බදු ගෙවීම සම්බන්ධයෙන් මෙමගින් හඳුන්වා දෙනු ලබන වැදගත්ම වෙනස නම්, බදු ගෙවිය යුතු නියමිත දින සිට දින 30ක ගෙවීමේ කාලසීමාව තුළ අදාළ බද්ද හෝ ගාස්තුව සම්පූර්ණයෙන් ගෙවීමට අපොහොසත් වන ඕනෑම බලපත්‍රලාභියෙකුගේ බෝතල් කිරීමේ බලපත්‍රය අත්හිටුවීමට කටයුතු කිරීමයි. මීට පෙර මෙවැනි නීතිරීති ක්‍රියාත්මක නොවූ අතර එය නව රෙගුලාසියක් ලෙස හඳුන්වා දී ඇත. තවද, නව ගැසට් නිවේදනය අනුව, යම් බලපත්‍රලාභියෙකු නියමිත දින සිට දින 90ක් ඉක්මවන කාලයක් තුෑල් ඔහුගේ ගෙවිය යුතු බදු හා ගාස්තුව සම්පූර්ණයෙන්ම ගෙවා නොමැති නම්, එම බලපත්‍රලාභියාගේ සියලුම බලපත්‍ර අත්හිටුවනු ලබන බව ද සඳහන් වේ. මීට පෙර බලපත්‍ර අත්හිටුවීමේ කාලසීමාව මාස හයක් වූ නමුත්, එය මාස තුනක් දක්වා කෙටි කර ඇති අතර, බදු ගෙවීම් පැහැරහැරීම් වලක්වා ගැනීම සඳහා මෙම දැඩි ක්‍රියාමාර්ග ගැනීමට අදාළ අංශ පෙළඹවී ඇත. සුරාබදු දෙපාර්තමේන්තුව පවසන පරිදි, රජයට හිමි වන බදු අයිතිය කාලීනව හා සම්පූර්ණයෙන් ලබා ගැනීම සහ බදු ගෙවීමේ විධිවිධාන උල්ලංඝනය කිරීමට එරෙහිව නව බදු ක්‍රමයක් හඳුන්වාදීමේ අරමුණින් මෙම සංශෝධන සිදු කර තිබේ.