ගැඹුරු අවපාතය දුර්වල වෙයි පළාත් කිහිපයකට වැසි

කාලගුණ විද්‍යා දෙපාර්තමේන්තුව විසින් නිකුත් කරන ලද අලුත්ම වාර්තා අනුව, ගැඹුරු පීඩන අවපාතය කන්කසන්තුරය සිට කිලෝමීටර් 300ක් පමණ ඊසාන දිසාවට, අක්ෂාංශ 12.3°N හා දේශාංශ 80.6°E ආසන්නයේ දී කේන්ද්‍රගත වී ඇත. මෙම පද්ධතිය දැනට දිවයිනෙන් තව දුරටත් ඉවතට, උතුරු දෙසට ගමන් කරමින් පවතින අතර ඉදිරි පැය කිහිපය තුළ දී දුර්වල වී යනු ඇතැයි අපේක්ෂා කෙරේ. මෙම කාලගුණ තත්ත්වය හේතුවෙන් අද (01) දිනයේ දී උතුරු, බස්නාහිර, සබරගමුව, දකුණු පළාත් සහ මහනුවර හා නුවරඑළිය දිස්ත්‍රික්කවල වැසි වාර කිහිපයක් ලැබෙනු ඇත. එසේම ඌව පළාතේ ද, මඩකලපුව හා අම්පාර දිස්ත්‍රික්කවල දී පස්වරු 2.00න් පසු ස්ථාන ස්වල්පයක ගිගුරුම් සහිත වැසි ඇති විය හැකිය. මුහුදු තත්ත්වය සම්බන්ධයෙන්, කාලගුණ විද්‍යා දෙපාර්තමේන්තුව විසින් දිවයින වටා වන මුහුදු ප්‍රදේශ සඳහා නිකුත් කර තිබූ ධීවර හා නාවික අනතුරු ඇඟවීම ඉවත් කර තිබේ. කෙසේ වෙතත්, කළුතර සිට ගාල්ල, මාතර හරහා පොතුවිල් දක්වා වන වෙරළබඩ මුහුදු ප්‍රදේශවලත්, ත්‍රිකුණාමලය සිට කන්කසන්තුරය හරහා මන්නාරම දක්වා වන මුහුදු ප්‍රදේශවලත් තැනින් තැන වැසි හෝ ගිගුරුම් සහිත වැසි ඇතිවිය හැකිය. පුත්තලම සිට කන්කසන්තුරය හරහා ත්‍රිකුණාමලය දක්වා සහ ගාල්ල සිට හම්බන්තොට හරහා පොතුවිල් දක්වා වන මුහුදු ප්‍රදේශ විටින් විට තරමක් රළු විය හැකි අතර, දිවයින වටා වන අනෙකුත් මුහුදු ප්‍රදේශ මඳ වශයෙන් රළු විය හැකිය. කාලගුණ විද්‍යා දෙපාර්තමේන්තුව ජනතාවගෙන් විශේෂයෙන් ඉල්ලා සිටින්නේ, ගිගුරුම් සහිත වැසි සමග ඇතිවිය හැකි තාවකාලික තද සුළං සහ අකුණු මඟින් සිදුවන අනතුරු අවම කර ගැනීම සඳහා අවශ්‍ය පූර්වාරක්ෂණ පියවර ගැනීමයි. අකුණු ඇති වන විට ගස් යට සහ ජලාශ ආසන්නයේ නතර නොවීම, ලෝහ භාණ්ඩ ස්පර්ශ නොකිරීම වැනි ආරක්ෂිත ක්‍රියාමාර්ග ගත යුතු බව ද එම දෙපාර්තමේන්තුව අවධාරණය කරයි.