විශේෂඥ වෛද්‍යවරිය ඇතුළු තිදෙනා එක්ව කළ වංචාව

ශ්‍රී ජයවර්ධනපුර රෝහලේ ස්නායු ශල්‍ය වෛද්‍යවරියක් ඇතුළු සැකකරුවන් තිදෙනෙකු විසින් තෙවන පාර්ශ්වයක් හරහා වැඩි මිලට ඖෂධ උපකරණ අලෙවි කිරීමේ වංචාවක් සිදුකර ඇති බවට අල්ලස් කොමිසම විසින් කරන ලද විමර්ශනවලින් හෙළිවී ඇත. මෙම වෛද්‍යවරිය 2023 වර්ෂයේදී පැමිණිලි ලැබීමෙන් පසුව අත්අඩංගුවට ගෙන රක්ෂිත බන්ධනාගාර ගතකර ඇත. ඇය ස්නායු සැත්කම් සඳහා අවශ්‍ය EVD සහ VP Shunt යන උපකරණ, වෙළඳපොළ මිලට වඩා ඉහළ මිලකට තෙවන පාර්ශ්වයක් හරහා අලෙවි කර ඇත. මෙම උපකරණ වෙළඳපොළේ රුපියල් 30,000 සිට 60,000 දක්වා වටිනාකමක් ඇති නමුත්, ඒවා රුපියල් 120,000 සිට 250,000 දක්වා වැඩි මිලට අලෙවි කර ඇත. මෙම වංචාව ආරම්භ කරන ලද්දේ වෛද්‍යවරියගේ සැමියා විසින් ආරම්භ කරන ලද සමාගමක් හරහා වන අතර, ඔහුගේ මරණයෙන් පසුව ඇය මෙම ගනුදෙනු තමාගේ පාලනය යටතේම කරගෙන ගොස් ඇත. ජයවර්ධනපුර රෝහලට මෙම උපකරණ වාර්ෂික ඇස්තමේන්තු හරහා ලබා ගත හැකි වුවද, වෛද්‍යවරිය නිතිපතා ක්‍රමය අනුගමනය නොකර මෙම ජාවාරම සිදුකර ඇත. ඇය රෝගීන්ගේ ඥාතීන්ට දුරකථන අංකයක් ලබාදී, එම පුද්ගලයා හරහා උපකරණ අලෙවි කර ඇත. මෙම අලෙවියෙන් ලැබුණු මුදල් වෛද්‍යවරිය සහ අදාළ පුද්ගලයාගේ ගිණුම්වලට බැරවී ඇත. එසේම, රෝගීන්ට වෙනත් ආයතනවලින් උපකරණ මිලදී ගැනීම වැළැක්වීම සඳහා අදාළ තුන්ඩු (prescription) නොදීම හෝ අවහිර කිරීම මෙම වංචාවේ තවත් අංගයකි. අල්ලස් කොමිසම විසින් මෙම වෛද්‍යවරිය යටතේ සැත්කම් කරගත් රෝගීන් 75 දෙනෙකුගේ ප්‍රකාශ සටහන් කර ඇති අතර, තවත් රෝගීන් 300ක ප්‍රකාශ ලබා ගැනීමට නියමිතව ඇත. විමර්ශනවලින් හෙළිවී ඇති පරිදි, මෙම රෝගීන්ගෙන් ලබාගත් තොරතුරු අනුව වෛද්‍යවරිය ඇතුළු තිදෙනා රුපියල් කෝටි 3ක පමණ මුදලක් උපයාගෙන ඇත. මෙම සිද්ධිය රෝහල් ක්‍රමයේ දුර්වලතා සහ ඖෂධ උපකරණ ජාවාරම්වලට එරෙහිව තදින්ම පියවර ගත යුතු බව එයින් පෙනී යයි.