පාසල් ඩෙංගු උවදුර මැඬලීමේ දිනය ලෙස ජූලි 09 වන දා ප්‍රකාශයට පත් කරමින් “ක්ලීන් ශ්‍රී ලංකා” දායකත්වයෙන් විශේෂ වැඩසටහනක්

මේ දිනවල ශ්‍රී ලංකාව පුරා පැතිරී ඇති ඩෙංගු සහ චිකුන්ගුන්යා රෝග ව්‍යාප්තිය නිෂ්පාදනය කිරීම සඳහා අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශය සහ ක්ලීන් ශ්‍රී ලංකා ලේකම් කාර්යාලය එක්ව "Clean Sri Lanka Day" නමින් විශේෂ වැඩසටහනක් 2024 ජූලි 09 වන දා සංවිධානය කරනු ලබයි. මෙම වැඩසටහනේ ප්‍රධාන අරමුණ වන්නේ ඩෙංගු මදුරුවන්ගේ බෝවන ස්ථාන හඳුනා ගෙන ඒවා ඉවත් කිරීම, රෝග ව්‍යාප්තිය වළක්වා ගැනීම සහ පාසල් දරුවන් තුළ පාරිසරික හා සමාජීය දැනුවත්භාවය වර්ධනය කිරීමයි. මෙහිදී දිවයින පුරා පාසල් 10,096ක් ආවරණය කරමින් චිත්‍ර, පොස්ටර්, නාට්‍ය, සංස්කෘතික සහ සංගීතමය ක්‍රියාකාරකම්, දැනුවත් කිරීමේ දේශන ඇතුළු විවිධ වැඩසටහන් සිසුන් සහ ගුරුවරුන්ගේ සහභාගීත්වයෙන් පැවැත්වේ. මීට අමතරව, මෙම වැඩසටහන විද්‍යා පීඨ හා වෘත්තීය අධ්‍යාපන ආයතනවල ද ක්‍රියාත්මක කිරීමට අපේක්ෂා කෙරේ. මෙම වැඩසටහන සඳහා සෞඛ්‍ය අමාත්‍යාංශය, ශ්‍රී ලංකා පොලීසිය, ත්‍රිවිධ හමුදාව, සිවිල් ආරක්ෂක දෙපාර්තමේන්තුව, දිස්ත්‍රික් හා ප්‍රාදේශීය ලේකම් කාර්යාල සහ ආණ්ඩුකාර කාර්යාලවල සහය ලබා ගැනීමට බලාපොරොත්තු වෙයි. අධ්‍යාපන අමාත්‍යාංශයේ ලේකම් නාලක කළුවැව, අතිරේක ලේකම් උදාරා දික්කුඹුර, සහකාර අධ්‍යාපන අධ්‍යක්ෂ (පිරිවෙන්) පූජ්‍ය කොහෙල්වල විපස්සී ස්වාමීන් වහන්සේ සහ ක්ලීන් ශ්‍රී ලංකා ලේකම් කාර්යාලයේ අධ්‍යක්ෂ (සමාජීය) කපිල සෙනරත් ඇතුළු උසස් නිලධාරීන් මෙම වැඩසටහන සංවිධානය කිරීම සඳහා සාකච්ඡා කිරීමට අධ්‍යාපන අමාත්‍යාංශයේදී එක්ව සිටියහ. මෙම උත්සාහය රටේ සෞඛ්‍ය සම්පන්න පරිසරයක් ගොඩනැගීමට මහඟු දායකත්වයක් ලබා දෙනු ඇතැයි බලාපොරොත්තු වේ.